የፖርቹጋላዊው ኮከብ ተጫዋች ክርስቲያኖ ሮናልዶ በአሁኑ ክለቡ አል-ነስር ያለው የወደፊት ቆይታ አሁንም እርግጠኛ አለመሆኑን የሳውዲ አረቢያ መገናኛ ብዙሃን ዘግበዋል። ሮናልዶ በአል-ነስር የዝውውር እቅድ ሂደት ደስተኛ እንዳልሆነና ቡድኑ ለዋንጫዎች የሚፎካከርበት ደረጃ ላይ እንዲደርስ እንደሚፈልግ ተገልጿል።
በሌላ በኩል የሳውዲ አረቢያ ኢንቨስትመንት ፈንድ ሮናልዶ ለአጭር ጊዜም ቢሆን ተቀናቃኛቸው የሆነውን አል-ሂላልን በመቀላቀል በአለም ክለቦች ዋንጫ ውድድር ላይ እንዲሳተፍ ፍላጎት እንዳለው ተዘግቧል።
በተጨማሪም በቅርቡ ከፊፋው ፕሬዝዳንት ጂያኒ ኢንፋንቲኖ ጋር ወደ ሳውዲ አረቢያ ጉዞ ያደረጉት የቀድሞው የአሜሪካ ፕሬዝዳንት ዶናልድ ትራምፕ ሳይቀሩ ሮናልዶ በዚሁ ውድድር ላይ እንዲሳተፍ እንደሚፈልጉ መገናኛ ብዙሃን ዘግበዋል።
በመሆኑም ክርስቲያኖ ሮናልዶ በአለም ክለቦች ዋንጫ ላይ ስለሚኖረው ተሳትፎ እስካሁን የተረጋገጠ ነገር የለም። የአል-ነስር የወደፊት እቅዶችና የሮናልዶ የግል ውሳኔ ይህንኑ የሚወስኑ ይሆናል።
